हिवरा आश्रमाकडून साहित्य संमेलनाच्या स्थळाचा प्रस्ताव मागे

91 वं अखिल भारतीय मराठी साहित्य संमेलन बुलडाणा जिल्ह्यातल्या मेहकरमधील हिवरा आश्रमात होणार होतं. मात्र त्यावरुन वाद निर्माण झाल्यानंतर आश्रमाचे अध्यक्ष रतनलाल मालपाणी यांनी प्रस्ताव मागे घेतला.

हिवरा आश्रमाकडून साहित्य संमेलनाच्या स्थळाचा प्रस्ताव मागे

बुलडाणा : 91 व्या अखिल भारतीय मराठी साहित्य संमेलनाच्या स्थळावरुन सुरु झालेला वाद तूर्तास शमला आहे. शुकदास महाराजांच्या विवेकानंद आश्रमाने दिलेला प्रस्ताव मागे घेतला आहे.

विवेकानंद आश्रमाने विदर्भ साहित्य मंडळाला आपल्या आश्रमात साहित्य संमेलन आयोजित करण्याचा प्रस्ताव दिला होता. त्यानुसार 91 वं अखिल भारतीय मराठी साहित्य संमेलन बुलडाणा जिल्ह्यातल्या मेहकरमधील हिवरा आश्रमात होणार होतं. मात्र त्यावरुन वाद निर्माण झाल्यानंतर आश्रमाचे अध्यक्ष रतनलाल मालपाणी यांनी प्रस्ताव मागे घेतला.

काय आहे प्रकरण?

बुलडाण्याच्या हिवरा आश्रमात होणाऱ्या अखिल भारतीय मराठी साहित्य संमेलनाला अंधश्रद्धा निर्मूलन समितीने आक्षेप घेतला होता. हिवरा आश्रम हा वादग्रस्त शुकदास महाराजांचा असल्याने, त्या ठिकाणी संमेलन घेऊ नये, अशी मागणी अंनिसनं केली होती.

अंनिसचे राष्ट्रीय कार्याध्यक्ष उमेश चौबे यांनी हा आक्षेप घेतला होता. अंनिसच्या श्याम मानव यांनी शुकदास महाराजांचा भांडाफोड केल्याचा दाखलाही फेसबुकवर दिला होता.

श्याम मानव यांची फेसबुक पोस्ट :

साहित्य संमेलन भोगीदास आश्रमात? शुकदास महाराजाच्या हिवरा आश्रमात अखिल भारतीय साहित्य संमेलन भरवण्याचा निर्णय महामंडळाने घेतल्याचे कळते. विवेकानंदांसारख्या विवेकी योग्याचे नाव वापरणाऱ्या, पण प्रत्यक्षात ‘रजनिशांच्या तंबूतील उंट’ असणाऱ्या ढोंगी शुकदास महाराजांच्या आश्रमात साहित्य संमेलन घेऊन साहित्य महामंडळ साहित्य रसिक जनतेसमोर कोणता आदर्श ठेऊ इच्छिते.

दै. लोकमत मध्ये 1984 मध्ये शुकदासाचे ढोंग उघडकीस आणणारे चार लेख मी लिहिले होते. त्यात ब्रह्मचारी असण्याचे सोंग घेणारा हा शुकदास सुंदर मुलींना एकट्यात ‘गेल्या जन्मी मी भगवान कृष्ण, तू राधा’ असे सांगून कसे फशी पाडून त्यांचे शोषण करत असे हे विस्ताराने लिहिले आहे. ‘कृष्णाचे सोंग घेणारा राधेचा शुकदास’ कसा श्रद्धेचा फायदा घेऊन फसवतो हे आजही माझ्या 1988 साली प्रसिद्ध झालेल्या ‘बुवाबाजी बळी स्त्रियांचा’ या पुस्तकात वाचू शकता.

असल्या ढोंगी बाबाला व त्याच्या शोषणाला साहित्य संमेलन प्रतिष्ठा देणार असेल तर अखिल भारतीय अंधश्रद्धा निर्मूलन समिती सर्व समविचारी पुरोगामी संघटनांच्यासह कडाडून विरोध करेल. संपूर्ण परिसरात ‘शुकदासांच्या रासलीला’ जाहीर सभांद्वारे पुन्हा जनतेसमोर मांडू आणि रसिकांचे प्रबोधन करू.

श्याम मानव

संस्थापक व संघटक,अ. भा. अंधश्रद्धा निर्मूलन समिती.

संबंधित बातम्या :


साहित्य संमेलनाच्या स्थळाला अंधश्रद्धा निर्मूलन समितीचा आक्षेप


91 व्या अखिल भारतीय मराठी साहित्य संमेलनाचं ठिकाण ठरलं!

महाराष्ट्र शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा. तसंच आमचं Marathi News App डाऊनलोड करा!
Web Title:
Find Marathi News from Mumbai, Pune, Nashik, Politics, Technology, Sports, Bollywood, Agriculture. याशिवाय आणखी काही रंजक बातम्या
First Published:
LiveTV