पदार्पणाच्या 7 वर्षांनी चमकला, अनेक कर्णधारांवर केले होते आरोप!

या मालिकेतून जयदेव प्रकाश झोतात आला असला, तरी त्याने 7 वर्षांपूर्वी पदार्पण केलं होतं. मात्र करिअरच्या चढउतारामुळे जयदेव लक्ष वेधू शकला नव्हता.

पदार्पणाच्या 7 वर्षांनी चमकला, अनेक कर्णधारांवर केले होते आरोप!

 मुंबई: श्रीलंकेविरुद्धच्या टी 20 मालिकेत भारताचा युवा गोलंदाज जयदेव उनाडकट मालिकावीराचा मानकरी ठरला. जयदेवने यजुवेंद्र चहल, हार्दिक पंड्या आणि कुलदीप यादव यांच्यापेक्षा कमी विकेट घेतल्या. मात्र त्याची सरासरी चांगली होती.

जयदेवने 3 सामन्यांत 9 षटकं गोलंदाजी केली. यामध्ये त्याने 44 धावा देत 4 विकेट्स घेतल्या. त्याचा इकॉनॉमी रेट 4.88 होता.

या मालिकेतून जयदेव प्रकाश झोतात आला असला, तरी त्याने 7 वर्षांपूर्वी पदार्पण केलं होतं. मात्र करिअरच्या चढउतारामुळे जयदेव लक्ष वेधू शकला नव्हता.

 7 वर्षांपूर्वी पदार्पण

जयदेवने डिसेंबर 2010 मध्ये आंतरराष्ट्रीय क्रिकेटमध्ये पदार्पण केलं. तो सेंच्युरियनमध्ये दक्षिण आफ्रिकेविरुद्धच्या पहिल्या कसोटी सामन्यात खेळला. या सामन्यात त्याला एकही विकेट घेता आली नाही.

यानंतर तब्बल तीन वर्षांनी उनाडकटची पुन्हा भारतीय संघात निवड झाली. 2013 मध्ये भारतीय संघ झिम्बाब्वे दौऱ्यावर होता, त्या संघात उनाडकटला संधी देण्यात आली होती. त्यावेळी त्याने 7 वन डे सामन्यात 8 विकेट घेतला होता.

मग पुन्हा उनाडकटला डावलण्यात आलं. पुन्हा तीन वर्षांनी जून 2016 मध्ये तो परत झिम्बाब्वेविरुद्धच्या टी 20 संघात निवडला गेला.

Jaydev Unadkat 1

पहिल्या टी ट्वेण्टी सामन्यात त्याने 4 षटकात 43 धावा दिल्या. या दौऱ्यातील एकमेव टी ट्वेण्टी सामना टीम इंडियाने गमावला. त्याचा फटका जयदेवला बसला, त्याला संघातून वगळण्यात आलं.

टीम इंडियात कमी काळासाठी निवड आणि जास्त वेळ बाहेर, असंच काहीसं उनाडकटबाबत घडत होतं. मात्र तो देशांतर्गत क्रिकेटमध्ये चमकदार कामगिरी करत राहिला. आयपीएलमध्ये तर त्याने सर्वांचं लक्ष वेधून घेतलं.

त्याचाच फायदा उनाडकटला झाला. पुन्हा एकदा जयदेवची भारताच्या संघात निवड करण्यात आली. श्रीलंकेविरुद्धच्या टी 20 मालिकेत त्याने जबरदस्त गोलंदाजी करुन, मालिकावीराचा मान मिळवला.

धोनबद्दल म्हणतो...

उनाडकटने एका मुलाखतीत आपली खदखद व्यक्त केली होती.

देशांतर्गत क्रिकेटमध्ये सातत्याने चांगली कामगिरी करुनही, संघाबाहेर राहावं लागतं. कोणत्याही कर्णधाराने हवा तसा पाठिंबा दिला नाही, असं उनाडकट म्हणाला होता. मात्र त्याने धोनीचं कौतुक केलं होतं.

Jaydev Unadkat 3

उनाडकट आयपीएलमध्ये धोनीच्या पुणे संघाकडून खेळला. पहिल्याच सामन्यात उत्तम कामगिरी केल्यामुळे प्रशिक्षक स्टीफन फ्लेमिंग आणि कर्णधार स्टीव्ह स्मिथने पाठिंबा दिला. स्मिथ आणि धोनी भाईने मला मार्गदर्शन केलं. दबावात कामगिरी कशी करावी हे धोनीने सांगितलं, असं उनाडकट म्हणाला.

आयपीएल 2017 मध्ये जयदेवने हॅटट्रिकसह 12 सामन्यात 24 विकेट घेतल्या होत्या.

क्रीडा शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा. तसंच आमचं Marathi News App डाऊनलोड करा!
Web Title: Special report on Jaydev unadkat, team india bowler
Find Marathi News from Mumbai, Pune, Nashik, Politics, Technology, Sports, Bollywood, Agriculture. याशिवाय आणखी काही रंजक बातम्या
First Published:
LiveTV